Førde er kommunesenteret i Sunnfjord kommune. Kommunen blei til i 2020 ved samanslåing av Førde, Naustdal, Gaular og Jølster kommunar som del av ei landsomfattande kommunereform.
Det er forventa at folketalet i Sunnfjord vil liggje stabilt fram til 2050, i overkant av 10 000 i Førde og 22 000 i heile kommunen.
Byen Førde er eit viktig handels- og administrasjonssenter i regionen. Her er vidaregåande skular, folkehøgskule og jordbruksskule. Vidare finst Høgskulen på Vestlandet med avdeling for ingeniør- og helsefag, fylkesbibliotek og sjukehus.
Offentleg og privat tenesteyting utgjør størstedelen av dei sysselsette i tettstaden. Største arbeidsplass er Førde sentralsjukehus i Helse Førde HF. Her er i tillegg ein del industri, administrasjon og servicenæring. Førde har stor turisttrafikk.
I Førde kjem dagsavisa Firda ut, og NRK Vestland har eigen redaksjon i byen.
Lotteri- og stiftelsestilsynet held til i Førde. I 2018 vart hovudkontoret til Fredskorpset flytta frå Oslo til Førde. Fredskorpset bytte samtidig namn til Norec, Norsk senter for utvekslingssamarbeid.
Med sine mange bilforretningar blir også Førde kalla «bilbyen». Bilforretningane utgjer ein stor del av næringslivet, og du finn forhandlarar av dei fleste bilmerka her.
Siste åra har også IT-sektoren blitt ei stor næring i Førde, m.a. i IT-klynga PEAK Sunnfjord der største leigeatakar er Tibber.
Førde er det største handelssenteret mellom Bergen og Ålesund, og omsetninga i varehandel er blant de høgaste i landet per innbyggjar.